Jólanostalgía í Görðum – sýning sem gleður unga sem aldna

Með aðventunni kemur löngun til að hægja á, rifja upp góðar minningar og leyfa jólastemningunni að smeygja sér inn í daglegt líf. Á Byggðasafninu í Görðum, þar sem sagan lifnar við í gömlum munum og sögum, hefur opnað hlýleg og nostalgísk jólasýning í Steypunni sérsýningarými safnsins, þar býðst gestum að stíga inn í heim jólanna eins og þau gátu litið út á árum áður. Sýningin er kærkomið tilefni til að staldra við, líta um öxl og deila augnabliki yfir kynslóðir.

Jólasýningin er samansafn hátíðlegra safnmunar úr eigu Byggðasafnsins í Görðum og endurspeglar jólahald fyrri kynslóða, með áherslu á stemningu, hefðir og daglegt líf. Þar má finna muni sem margir kannast við úr eigin æsku eða af heimilum foreldra og afa og ömmu — og fyrir yngri gesti opnast gluggi inn í fortíðina þar sem jólaundirbúningur, skreytingar og leikföng segja sína sögu.

Fyrir áhugasöm þá má finna alla skráða safnmuni Byggðasafnsins á Sarpi - Hér má til dæmis já allskyns jólagóss.

Á sýningunni okkar í Steypunni má sjá fjölbreytta muni sem mörg kannast við úr eigin æsku eða af heimilum ættingja – og fyrir yngri gesti opnast gluggi inn í fortíðina þar sem jólaundirbúningur, skreytingar og leikföng segja sína sögu. Sýningin er því ekki síður fróðleg en hún er notaleg og hentar jafnt börnum sem fullorðnum.

Nýjung í safnbúð safnsins - Jólakort og Jóla merkimiðar!

Samhliða opnun sýningarinnar hefur safnið sett í sölu hugguleg jólakort og merkimiða sem unnin eru upp úr hátíðlegum safnmunum sýningarinnar. Í boði eru þrjár útgáfur af jólatrjám og þrjár útgáfur af rugguhestum, sem endurspegla anda sýningarinnar og jólanna sjálfra.

Jólakort með umslagi kosta 500 krónur og merkimiðar eru seldir í pakka með sex stykkjum, þar sem allar myndirnar eru saman, á 1.000 krónur. Allur ágóði af sölu jólavarningsins rennur í barnamenningarverkefni á safninu sem leggja áherslu á fræðslu, leik og sköpun — og hjálpa börnum að tengjast sínum menningararfi á eigin forsendum.

Við hefjum söluna á morgun laugardaginn 13. desember milli 13:00 - 17:00, ef þið óskið þess að kaupa miða utan opnunartíma þá er hægt að hafa samband við safnið milli 09:00-16:00 alla virka daga á netfangi museum@museum.is eða í síma 4331150.

Gestir eru hvattir til að líta við á Byggðasafninu í Görðum, njóta jólastemningarinnar og rifja upp eða kynnast jólum fyrri tíma. Það er ekki ólíklegt að einhver muni rekast á safnmuni sem veki upp hlýjar minningar úr eigin heimahögum.

Hér má sjá kortin og merkimiðana. Hvetjum ykkur til að láta sjá ykkur á safninu á morgun og næla ykkur í merkimiða á pakkana og jólakort til að senda eða nota sem skraut heima fyrir.